بنگلادیش: کشتی میں آگ لگنے سے 37 افراد ہلاک

بنگلادیش: کشتی میں آگ لگنے سے 37 افراد ہلاک
ڈھاکہ : بنگلادیش میں کشتی میں آگ لگنے سے 37 افراد ہلاک ہوگئے۔غیر ملکی میڈیا کے مطابق حادثہ جمعہ کی صبح پیش آیا جہاں جنوبی بنگلادیش میں ایک کشتی میں آگ لگ گئی جس میں اب تک 37 افراد کی ہلاکت کی تصدیق کی گئی ہے۔میڈیا رپورٹس میں بتایا گیا ہے کہ ڈھاکا سے 250 کلو میٹر دور جھلوکٹھی سے گزرنے والی اس کشتی میں تقریباً 500 افراد سوار تھے، تین منزلہ کشتی نے سفر کے دوران دریا کے بیچ میں آگ پکڑ لی جس کے بعد متعدد افراد نے دریا میں چھلانگ لگادی۔

مقامی حکام کا بتانا ہےکہ حادثے کے بعد اب تک 37 افراد کی لاشیں نکالی جاچکی ہیں جن میں سے کچھ افراد جھلسنے اور کچھ پانی میں ڈوب کر جاں بحق ہوئے۔پولیس کا کہنا ہے کہ کشتی میں انجن روم سے لگنے والی آگ فیری کے دیگر حصوں تک پھیلی،جس پر قابو پانے میں چار سے پانچ گھنٹے لگے۔ پولیس کے مطابق کشتی ڈھاکا واپس جارہی تھی، حادثے میں زخمی ہونے والے 100 افراد کو طبی امداد کے لیے اسپتال منتقل کیا گیا ہے جن میں سے بیشتر کی حالت تشویشناک ہے جس کے باعث ہلاکتوں میں بھی اضافے کا خدشہ ہے۔