مکہ مکرمہ: مسجد الحرام اور مسجد نبوی ﷺ میں عید الاضحیٰ کی نماز کے روح پرور اجتماعات منعقد ہوئے۔
نماز کی ادائیگی کے بعد فضا عید کی تکبیرات کے ورد اور اللہ اکبر کی صداؤں سے گونج اٹھی، عید الضحیٰ کی نماز کے لیے مسجد الحرام اور مسجد نبوی ﷺ میں لاکھوں عازمین حج اور مقامی افراد شریک ہوئے۔
سعودی عرب میں عید الضحیٰ کی نماز کے سب سے بڑے اجتماع کے موقع پر حرم شریف کے شیخ الحدیث عبدالرحمان السدیس نے عید کی نماز کا خطبہ دیا۔
حجاج کرام سنتِ ابراہیمی کی ادائیگی کرتے ہوئے جانوروں کی قربانی کریں گے اور قربانی کے بعد احرام کھول دیے جائیں گے۔
اس موقع پر اسلام کی سر بلندی، امتِ مسلمہ کی سلامتی اور ترقی کے لیے خصوصی دعائیں کی گئیں۔
خلیجی ممالک سمیت امریکا اور کینیڈا اور دیگر یورپی ممالک میں مقیم مسلمان آج عیدالاضحیٰ مذہبی عقیدت و احترام کے ساتھ منا رہے ہیں۔
عالمی خبر رساں ادارے کے مطابق آج خلیجی ریاستوں سمیت مشرق وسطیٰ اور یورپی ممالک کے کئی ممالک میں عید الاضحیٰ منائی جا رہی ہے۔ نماز عید کے اجتماعات منعقد ہوئے اور سنت ابراہیمی کی پیروی میں جانور ذبح کیے گئے۔
مشرق وسطیٰ بشمول سعودی عرب، متحدہ عرب امارات، قطر، کویت، عمان، اردن، شام اور عراق کے علاوہ برطانیہ، امریکا اور کینیڈا میں بھی مسلمان عیدالاضحیٰ انتہائی مذہبی جوش و جذبے سے منارہے ہیں۔
اہل خانہ، دوست احباب اور ہم سائیوں سے ملے۔ عید کی مبارک باد دی اور قربانی کے بعد روایتی اور علاقائی پکوان تیار کیے گئے۔ دعوتوں کا اہتمام کیا گیا۔
امریکا، برطانیہ اور کینیڈا سمیت دیگر ممالک کے سربراہان نے عالم اسلام کو عید الاضحیٰ کی مبارک باد پیش کی۔
خیال رہے کہ پاکستان سمیت ایشیائی ممالک میں عید الاضحیٰ کل بروز پیر 17 جون کو منائی جائے گی۔