وزیر اعظم کے معاون خصوصی طارق فاطمی نے جمعرات کو امریکی نائب سیکریٹری آف اسٹیٹ وینڈی شرمین کو بتایا کہ پاکستان مشکلات سے دوچار معیشت کی بحالی کے لیے امریکا کو ایک اہم پارٹنر کے طور پر دیکھتا ہے۔
ڈان اخبار کی رپورٹ کے مطابق محکمہ خارجہ کے ترجمان نیڈ پرائس نے کہا کہ ڈپٹی سیکریٹری وینڈی شرمین نے امریکا اور پاکستان کے درمیان سفارتی تعلقات کی 75 ویں سالگرہ کا ذکر کیا اور ہمارے اقتصادی اور تجارتی تعلقات اور صحت سے متعلق تعاون کو آگے بڑھا کر امریکا پاکستان تعلقات کو بڑھانے کے لیے ہمارے مشترکہ اہداف کی توثیق کی۔
پاکستانی سفارت خانے کی ایک پریس ریلیز میں کہا گیا کہ طارق فاطمی نے امریکی عہدیدار کو بتایا کہ پاکستان امریکا کے ساتھ برابری، باہمی تعاون اور باہمی فائدے کی بنیاد پر قریبی اور خوشگوار تعلقات کا خواہاں ہے، انہوں نے ڈپٹی سیکریٹری کو بتایا کہ پاکستان علاقائی امن، سلامتی اور خوشحالی کو فروغ دینے میں ایک اہم ملک ہے اور دوطرفہ تعلقات کو خاطر خواہ انداز میں آگے بڑھانا دونوں ممالک کے مفادات میں کام کرے گا۔
طارق فاطمی نے وینڈی شرمین کو بتایا کہ اسلام آباد واشنگٹن کو پاکستان کی مشکلات سے دوچار معیشت کی بحالی کی کوششوں میں ایک اہم شراکت دار کے طور پر دیکھتا ہے۔
تاہم ترجمان نیڈ پرائس نے افغانستان میں علاقائی استحکام پر ہم آہنگی پر زور دیا لیکن انہوں نے یوکرین پر روسی صدر پیوٹن کے حملے کے تباہ کن اثرات سے نمٹنے کے لیے پاکستان اور دنیا بھر میں غذائی تحفظ پر تعاون کی کوششوں کی ضرورت کا بھی ذکر کیا۔
سفارت خانے کے بیان میں کہا گیا ہے کہ طارق فاطمی نے تجارت، سرمایہ کاری، زراعت، ٹیکسٹائل اور آئی ٹی کے شعبوں میں دوطرفہ تعاون میں اضافے کی پاکستان کی خواہش پر زور دیا اور اسے پاکستان کی اہم ترجیح قرار دیا۔