ایٹلانٹا: ایک نئی تحقیق میں بتایا گیا ہے کہ آئندہ چند دہائیوں میں مردوں میں کینسر کی شرح آسمان کو چھونے کا امکان ہے۔
پیر کے روز امریکن کینسر سوسائٹی کے ریسرچ جرنل ‘کینسر’ میں شائع ہونے والی تحقیق کے مطابق 2022 سے 2050 کے دوران مردوں میں کینسر کی شرح میں 84 فیصد اضافہ متوقع ہے جبکہ اسی عرصے میں کینسر سے ہونے والی اموات میں 93.2 فیصد اضافے کا امکان ہے۔
تحقیق کے مطابق اس معاملے میں مردوں کے زیادہ متاثر ہونے کی وجہ تمباکو نوشی اور شراب نوشی جیسے عوامل میں زیادہ مبتلا ہونا ہے۔
تحقیق کے مطابق مردوں کو خواتین کے مقابلے میں کام کی جگہ پر کینسر پیدا کرنے والے زیادہ خطرناک عوامل جیسے کہ نقصان دہ کیمیکلز، تابکاری اور ایسبسٹوس کا سامنا کرنا پڑتا ہے۔
تحقیق کے مطابق 65 سال کی عمر کے مرد جو کینسر کی نایاب قسم میں مبتلا ہیں یا ایسے ملک میں رہتے ہیں جہاں ہیومن ڈیولپمنٹ انڈیکس کم ہے ان کی موت کے امکانات بھی زیادہ ہوتے ہیں۔
محققین نے یہ بھی بتایا کہ سرویکل کینسر کی طرح خواتین کو متاثر کرنے والے کینسر کی ابتدائی تشخیص کے زیادہ آپشن موجود ہیں۔
محققین نے مردوں میں کینسر سے ہونے والی اموات میں کمی کو یقینی بنانے کے لئے متعدد سفارشات بھی پیش کیں۔