بھارت کے معروف گلوکار ارجیت سنگھ نے اپنے کنسرٹ کے دوران پاکستانی جھنڈا لہرانے کی اجازت دے کر پاکستانیوں کے دل جیت لیے ہیں۔
سوشل میڈیا پر اس وقت ارجیت سنگھ کے کنسرٹ سے لی گئی دو ویڈیوز خوب وائرل ہو رہی ہے۔
پہلی ویڈیو میں دیکھا جا سکتا ہے کہ کنسرٹ میں ارجیت سنگھ کے کچھ پاکستانی فین بھی موجود ہیں، اُن میں سے ایک کنسرٹ کے دوران سبز ہلالی پرچم لہرا رہا ہے۔
پاکستانی جھنڈا لہرانے پر سیکیورٹی گارڈ کی جانب سے روکے جانے پر ارجیت سنگھ اشارے سے سیکیورٹی کو منع کر دیتے ہیں اور پاکستانی فین کو جھنڈا لہرانے کی اجازت دے دیتے ہیں۔
ارجیت سنگھ کا کنسرٹ ہال اس لمحے تالیوں سے گونج اٹھا۔
بعد ازاں ارجیت سنگھ ناصرف پاکستانی جھنڈے کے احترام میں ہاتھ جوڑ کر جھکتے ہیں بلکہ جھنڈے کے لیے دور ہی سے بوسہ بھی دیتے ہوئے نظر آ رہے ہیں۔
سوشل میڈیا پر وائرل ہوتی اِن ویڈیوز پر ارجیت سنگھ کے مداح بے حد جذباتی اور اُن کے اس عمل پر اُن سے محبت کا اظہار کرتے ہوئے نظر آ رہے ہیں۔