بالی ووڈ کی معروف اداکارہ کرینہ کپور نے کہا ہے کہ حالات اور نئے دور نے بالی ووڈ میں اسٹارز عہد کو ختم کردیا ہے، اب یہاں کوئی اسٹار نہیں بلکہ سب اداکار ہیں اور اس بات کی بھی کوئی ضمانت نہیں کہ کل کسی کی فلم 50 کروڑ کا بزنس کرے۔ ان کا کہنا تھا کہ اب اسٹارڈم اور کامیابی بے معنی ہوگئی ہے۔
واضح رہے کہ بالی ووڈ کے مشہور فلمی گھرانے سے تعلق رکھنے والی کرینہ کپور جلد ہی اپنا او ٹی ٹی ڈیبیو سوجوئے گھوش کے نیٹ فلیکس پر ڈیووشن آف سسپیکٹ ایکس کی طرز پر تیار ہونے والی سیریز میں سے کرنے والی ہیں۔
عامر خان کے ساتھ فلم لال سنگھ چڈھا میں مرکزی کردار ادا کرنے والی کرینہ کا کہنا تھا کہ ان کا یہ یقین ہے کہ فلم کی کامیابی کا انحصار اس کی کمرشل کامیابی میں ہے۔ لہٰذا اب ایک اسٹار ہونے سے فلم کامیاب نہیں ہوسکتی۔
اب کسی کو پتہ نہیں کیا ہو رہا ہے اور ہمیں کس سمت پر جانا ہے۔ تو پھر ساری توجہ مواد اور اسکرپٹ پر ہونا چاہیے۔ پڑھنا اور لکھنا اچھی چیز ہے اسی سے تمام اداکار محفوظ رہیں گے۔
اگر ہم یہ سوچیں اور توجہ دیں کہ ہم اسٹارز پر پروجیکٹس بنائیں تو ایسا موجودہ حالات میں ممکن نہیں۔ اب لوگ فلمی مواد دیکھنا چاہتے ہیں، کورونا وائرس کے دوران سب کچھ تبدیل ہوگیا ہے، لوگوں کو یہ بات سمجھ میں آگئی ہے کہ اب کوئی خدا نہیں ہے اور کوئی تن تنہا کسی چیز کو تبدیل نہیں کرسکتا۔