اپنے متنازع بیانات کی وجہ سے خبروں کی زینت رہنے والی بالی وڈ اداکارہ اور سیاستدان کنگنا رناوت نے ایک بار پھر اپنے ساتھی بالی وڈ اداکاروں کو نشانے پر لے لیا ہے۔
اپنے ایک حالیہ انٹرویو میں کنگنا رناوت نے بالی وڈ سے تعلق رکھنے والی شخصیات اور ان کے لائف اسٹائل کو تنقیدکا نشانہ بنایا۔
کنگنا رناوت کا کہنا تھا کہ بالی وڈ کے لوگ انتہائی خود غرض، بدتمیز اور گونگے ہیں۔
اداکارہ کا یہ بھی کہنا تھا کہ میں بالی وڈ ٹائپ کی نہیں ہوں، میری کسی بالی وڈ سلیبرٹی سے دوستی نہیں ہوسکتی، وہ لوگ برانڈڈ بیگز اور گاڑیوں کے علاوہ کوئی اور بات نہیں کرسکتے۔
ان کا کہنا تھا کہ اگر یہ لوگ شوٹنگ نہ کر رہے ہوں تو پھر ان کے پاس کوئی کام نہیں ہوتا، بس صبح اٹھنا ہے، کچھ ورزش، پھر سونا پھر اٹھنا ، بس یہی معمول ہوتا ہے، ان کو کچھ نہیں پتا کہ دنیا میں کیا چل رہا ہے، ایسے لوگوں سے کوئی کیسے دوستی کرسکتا ہے۔
خیال رہے کہ کنگنا رناوت کی فلم ‘ایمرجنسی’ کا ٹریلر حال ہی میں ریلیز ہوا ہے جس کی ہدایت کاری خود انہوں نےکی ہے۔
ٹریلر کی افتتاحی تقریب میں سلمان، عامر اور شاہ رخ خان کے حوالے سے اپنے خیالات کا اظہار کرتے ہوئے کنگنا رناوت نے بتایا کہ تینوں میں کوئی بھی خان ان کا پسندیدہ نہیں ہے، اگر کوئی خان پسند ہے تو وہ مرحوم عرفان خان ہے اور انہیں اس بات کا پچھتاوا ہے کہ وہ عرفان خان کے لیے فلم کی ہدایت کاری نہیں کر سکیں۔