لاہور کی سیشن عدالت نے ہتک عزت کے دعویٰ میں گلوکارہ میشاء شفیع کی ویڈیو لنک جرح کی درخواست خارج کرنے کا تحریری فیصلہ جاری کر دیا۔
عدالت نے قرار دیا کہ کینیڈا میں پاکستانی ایمبیسی کے اوقات کار اور عدالتی اوقات کار میں فرق کی وجہ سے درخواست خارج کی جاتی ہے۔
ایڈیشنل سیشن جج خان محمود نے گلوکارہ میشاء شفیع کی درخواست پر 2 صفحات پر مشتمل تحریری فیصلہ جاری کیا۔
عدالت نےقرار دیا کہ میشاء شفیع نے 9 سالہ بیٹی کے کورونا میں مبتلا ہونے کے سبب کینیڈا سے ویڈیو لنک پر جرح کی استدعا کی، کورونا قرنطینہ کا دورانیہ 14روز ہےجو میشاء کی درخواست دائر کرنے سے شمار کیا جائے تو وہ بھی مکمل ہو چکےہیں۔
اگر ویڈیو لنک پر جرح کا حکم دیا بھی جائے تو وہ پاکستانی سفارتخانے کے افسر کی موجودگی میں ہی ہو سکتی ہے۔
عدالت نے کہا کہ پاکستان اور کینیڈا میں10گھنٹے کا فرق ہے، ویڈیو لنک کی سہولت کی عدم دستیابی پر ایسی ہدایات نہ دینے کا ہائی کورٹ کا فیصلہ موجود ہے۔