اسلام آباد: پاکستان شوبز انڈسٹری کی سینئر اداکارہ بشریٰ انصاری بھی ملکۂ ترنم میڈم نور جہاں کے حق میں بول پڑیں۔فوٹو اینڈ ویڈیو شیئرنگ ایپ انسٹاگرام پر بشریٰ انصاری نے ملکۂ ترنم میڈم نور جہاں کے ہمراہ ماضی کی اپنی ایک نایاب تصویر شیئر کی ہے۔انسٹاگرام پر شیئر کی گئی تصویر میں میڈم نور جہاں گولڈن رنگ کی ساڑھی میں ملبوس ہیں جبکہ بشریٰ انصاری نے سیاہ اور گولڈن رنگ کی خوبصورت ساڑھی زیب تن کی ہوئی ہے۔بشریٰ انصاری نے اپنی پوسٹ کے کیپشن میں لکھا کہ ’میڈم نور جہاں گلوکاری کی دُنیا کی ملکہ تھیں اور ہمیشہ رہیں گی۔
‘اُنہوں نے کہا کہ ’کوئی بھی میڈم نور جہاں کا مقابلہ نہیں کرسکتا، وہ ہمارا فخر ہیں، ہماری لیجنڈ ہیں اور ہماری شناخت ہیں۔واضح رہے کہ علی عظمت نے ایک ٹاک شو کے دوران برسوں سے تبدیل ہوتی پاکستان میوزک انڈسٹری سے متعلق گفتگو کرتے ہوئے کہا تھا کہ میرے بچپن میں نور جہاں ساڑھی کے ساتھ بڑے بڑے جھمکے اور بُندے پہن کر اور اضافی میک اپ کرکے گانے گاتی تھیں، اس وقت ہمیں ان سے چِڑ ہوتی تھی۔علی عظمت نے کہا تھا کہ نور جہاں اس وقت بڑھاپے میں تھیں اور ہم سمجھتے تھے کہ انہیں دیکھنا ہمارے لیے ضروری نہیں ہے۔
علی عظمت کے اس بیان کی وجہ سے سوشل میڈیا صارفین سمیت شوبز ستارے اُنہیں شدید تنقید کا نشانہ بنایا۔بعدازاں اپنے ویڈیو بیان میں علی عظمت نے کہا کہ سوشل میڈیا پر میرے حوالے سے ایک مہم چلائی جارہی ہے، جس میں علی عظمت اور نورجہاں کا مقابلہ کیا جارہا ہے، علی عظمت نے کہا کہ جس نے بھی یہ ویڈیو پوسٹ کی ہے پوری نہیں کی بلکہ ایڈیٹ کرکے کی ہے۔گلوکار علی عظمت نے کہا کہ احمد علی بٹ اور حنا درانی میری فیملی ہیں میں ان سے بہت پیار کرتا ہوں اور ان کی عزت بھی کرتا ہوں، نہ صرف یہ بلکہ ان سے زیادہ میں میڈم نور جہاں سے پیار کرتا ہوں۔