ماسکو: روس نے اپنے فوجیوں کو یوکرین کے شہر خرسون سے نکلنے کا حکم دیا ہے۔
غیرملکی میڈیا کے مطابق روسی فوج کا یوکرین کے شہرخرسون سے نکلنے اہم پیش رفت ہے۔ روسی جنرل کا کہنا ہے کہ خرسون شہر میں موجود روسی فوجیوں کو سپلائی جاری رکھنا ممکن نہیں رہا ہے۔ خرسون سے انخلا کا فیصلہ مشکل ہے تاہم اپنے فوجیوں کی جان بچانے کے لیے اس کے سوا کوئی چارہ نہیں رہا۔
خرسون یوکرین کے ان چار علاقوں میں سے ایک ہے جن کا روسی صدر ولادی میر پیوٹن نے ستمبر میں روس سے الحاق کا اعلان کیا تھا۔ روس نے مارچ میں یوکرین پر حملے کے دوران خرسون پر قبضہ کیا تھا۔