پاکستان میں ایرانی سفارت خانے نے سیستان کے شہر مہرستان میں 8 پاکستانی شہریوں کے قتل پر شدید ردعمل دیتے ہوئے واقعے کی سخت مذمت کی ہے۔
ایرانی سفارت خانے کی جانب سے جاری بیان میں کہا گیا ہے کہ مہرستان میں 8 پاکستانیوں پر مسلح حملہ غیر انسانی اور بزدلانہ فعل ہے، جو کہ کسی صورت قابل قبول نہیں۔
بیان میں کہا گیا ہے کہ دہشتگردی پورے خطے کے لیے ایک مستقل اور مشترکہ خطرہ ہے، اور اس کے مکمل خاتمے کے لیے تمام ممالک کو متحد ہو کر مشترکہ جدوجہد کرنی ہوگی۔
ایرانی سفارت خانے نے مزید کہا کہ گزشتہ دہائیوں میں اسی رجحان نے ہزاروں بے گناہ انسانوں کی جانیں لے لی ہیں، اور اب خطے میں امن و استحکام کے لیے اجتماعی اور مربوط کوششیں وقت کی اہم ضرورت بن چکی ہیں۔
یاد رہے کہ ایران کے صوبے سیستان کے شہر مہرستان میں دہشتگردوں نے ایک ورکشاپ پر فائرنگ کرکے 8 پاکستانی کاریگروں کو قتل کر دیا۔ تمام مقتولین کا تعلق پنجاب کے شہر بہاولپور سے تھا۔
پاکستانی وزیراعظم شہباز شریف نے بھی اس واقعے کی شدید مذمت کرتے ہوئے ایرانی حکام سے مطالبہ کیا ہے کہ فوری تحقیقات کی جائیں اور اس بزدلانہ حملے میں ملوث مجرموں کو گرفتار کرکے قانون کے مطابق سخت سزا دی جائے۔