پاکستان تحریک انصاف کی سیاسی کمیٹی نے فیصلہ کیا ہے کہ صرف سیاسی کمیٹی کی جانب سے تیار کردہ فہرست میں شامل افراد ہی عمران خان سے جیل میں ملاقات کے اہل ہوں گے۔
سیاسی کمیٹی کے اجلاس میں ملک کی مجموعی صورتحال اور دیگر اہم معاملات پر تفصیلی غور کیا گیا۔ اجلاس میں فیصلہ ہوا کہ بانی پی ٹی آئی سے ملاقات کے لیے پانچ رکنی کمیٹی تشکیل دی جائے گی۔
یہ کمیٹی ہر منگل اور جمعرات کو عمران خان سے ملاقات کے خواہشمند افراد کی فہرست مرتب کرے گی، اور یہ فہرست عمران خان سے منظوری کے بعد جیل حکام کو بھیجی جائے گی۔
اعلامیہ کے مطابق بیرسٹر گوہر، سلمان اکرم راجا یا انتظار پنجوتھا میں سے کوئی ایک فرد فہرست کو جیل حکام تک پہنچائے گا۔ اس کے علاوہ کوئی اور شخص عمران خان سے ملاقات نہیں کر سکے گا۔
یہ طریقہ اسلام آباد ہائیکورٹ کے حکم اور عمران خان کی ہدایت کے مطابق ہے۔
سیاسی کمیٹی نے یہ بھی فیصلہ کیا کہ جیل حکام کے خلاف توہین عدالت کی فوری درخواست دائر کی جائے گی۔
البتہ خیبر پختونخوا کے حکومتی عہدیدار کسی بھی دن اور وقت بانی پی ٹی آئی سے ملاقات کے لیے آزاد ہوں گے، اور ان پر پانچ رکنی کمیٹی کی فہرست کی پابندی لاگو نہیں ہوگی۔