نیوزی لینڈ نے پاکستان کو پہلے ٹی ٹوئنٹی میچ میں 46 رنز سے شکست دے دی۔
پہلے ٹی ٹوئنٹی میچ میں نیوزی لینڈ نے پاکستان کو جیت کیلئے 227 رنز کا ہدف دیا تھا۔
نیوزی لینڈ کے خلاف پہلے ٹی ٹوئنٹی میچ میں پاکستان نے ٹاس جیت کر پہلے بولنگ کرانے کا فیصلہ کیا۔
بطور کپتان شاہین آفریدی نے ٹاس جیت کر پہلے بولنگ کرانے کے فیصلے کو میچ کے پہلے ہی اوور میں خود صحیح ثابت کردیا، انہوں نے دوسری ہی گیند پر ڈیون کونوے کو صفر پر کیچ آؤٹ کرایا۔
پہلی وکٹ گرنے کے بعد فِن ایلن اور کین ولیمسن نے پارٹنرشپ قائم کی۔ اس دوران فِن ایلن نے تیز بیٹنگ کی جبکہ کین ولیمسن نے روایتی انداز اپنایا اور دوسرے اینڈ سے اننگ کو آگے بڑھانے کی کوشش کرتے رہے۔
دونوں بیٹرز نے پارٹنرشپ قائم کر کے اسکور 50 رنز تک پہنچایا جس کے بعد 4.5 اوورز میں عباس آفریدی نے فِن ایلن کو 34 رنز پر کیچ آؤٹ کرایا۔
بعدازاں کین ولیمسن اور ڈیرل مچل نے بھی پارٹنرشپ قائم کی اور ٹیم کا مجموعی اسکور11.2 اوورز میں 128 رنز تک پہنچایا جس کے بعد کین ولیمسن 57 رنز پر عباسی آفریدی کے اوور میں کیچ آؤٹ ہوگئے۔
نیوزی لینڈ کی چوتھی وکٹ 14.5 اوورز میں گری جب گلین فلپس کو عباس آفریدی نے 19 رنز پر آؤٹ کیا۔
بعدازاں ڈیرل مچل نے ٹی ٹوئنٹی انٹرنیشنل کیریئر کی چھٹی نصف سنچری پاکستان کے خلاف اسکور کی، انہوں نے 22 گیندوں پر 4 چھکے اور 2 چوکوں کی مدد سے ففٹی بنائی جس کے بعد نیوزی لینڈ کی پانچویں وکٹ 16.1 اوورز میں 183 رنز پر گری، ڈیرل مچل کو 61 رنز پر شاہین آفریدی نے آؤٹ کیا۔
نیوزی لینڈ کی چھٹی وکٹ 19 ویں اوور میں 211 رنز پر گری، ایڈم ملن کو شاہین آفریدی نے 10 رنز پر آؤٹ کیا۔
بعدازاں پاکستان کے لیے ساتویں وکٹ حارث رؤف نے 19.2 اوورز میں 212 رنز پر حاصل کی، انہوں نے اش سودھی کو پہلی ہی گیند پر بولڈ کیا۔
نیوزی لینڈ کی آٹھویں وکٹ آخری اوور میں 220 رنز پر گری، مارک چیپمین کو 26 رنز پر حارث رؤف نے آؤٹ کیا۔
نیوزی لینڈ کی جانب سے میٹ ہینری صفر اور ٹم ساؤتھی 6 رنز پر ناٹ آؤٹ رہے اور پوری ٹیم نے مقررہ اوورز میں 8 وکٹ پر 226 رنز بنائے۔