پاکستان نے چھٹے ٹی 20 میچ میں 14 اوورز میں 4 وکٹ پر 110 رنز بنالیے ہیں، بابر اعظم نے ففٹی مکمل کرلی ہے، وہ وکٹ پر موجود ہیں۔
لاہور کے قذافی اسٹیڈیم میں کھیلے جارہے میچ میں انگلینڈ نے گزشتہ میچ کی طرح ٹاس جیت کر پہلے فیلڈنگ کرنے کا فیصلہ کیا۔
محمد رضوان کی جگہ ٹیم میں شامل کیے گئے محمد حارث نے اپنے ڈیبیو میچ میں کپتان بابر اعظم کے ہمراہ اوپننگ کی، وہ 14 کے اسکور پر ایک چھکے کی مدد سے 7 رنز بناکر پویلین لوٹ گئے۔
گرین شرٹس کی دوسری وکٹ 15 کے اسکور پر شان مسعود کی گری، جو بغیر کوئی رنز بنائے ایل بی ڈبلیو ہوگئے، اوپر تلے دو وکٹیں گرنے کے بعد حیدر علی کپتان بابراعظم کا ساتھ دینے کےلیے آئے۔
دونوں نے تیسری وکٹ پر 47 رنز کی شراکت قائم کی، 62 کے مجموعے پر حیدر علی بھی کپتان کا ساتھ چھوڑ گئے، انہوں نے18 رنز کی باری کے دوران 14 گیندوں کا سامنا کیا۔
چوتھی وکٹ پر کپتان بابر اعظم نے افتخار احمد کے ساتھ اسکور کو تیزی سے آگے بڑھانے کی کوشش کی، افتخار احمد 14 اعشاریہ 3 اوورز میں 21 گیندوں پر 31 رنز کی باری کھیل کر میدان چھوڑ گئے۔
دونوں کھلاڑیوں کے درمیان 35 گیندوں پر 48 رنز کی شراکت قائم ہوئی۔
سات میچوں کی سیریز میں پاکستان کو 2-3 کی برتری حاصل ہے۔
چھٹے میچ کے لیے پاکستان نے ٹیم میں 2 تبدیلیاں کی ہیں، محمد رضوان اور حارث رؤف کو آرام دیا گیا ہے، شاہنواز دھانی کی ٹیم میں واپسی ہوئی ہے جبکہ وکٹ کیپر محمد حارث آج اپنا پہلا ٹی ٹوئنٹی انٹرنیشنل میچ کھیل رہے ہیں۔
قومی ٹیم کی قیادت بابر اعظم کر رہے ہیں، نائب کپتان شاداب خان، محمد حارث، شان مسعود، افتخار احمد، آصف علی، حیدر علی، محمد نواز، محمد وسیم جونیئر، شاہنواز دھانی اور عامر جمال پلیئنگ الیون کا حصہ ہیں۔
انگلش ٹیم کے کپتان معین علی کا کہنا ہے کہ وکٹ کو دیکھ کر بولنگ کرنے کا فیصلہ کیا ہے۔
ٹیم پاکستان کے کپتان بابر اعظم نے کہا کہ 160 سے 170 رنز تک کا ہدف دینے کی کوشش کریں گے۔