نیو دہلی : بھارت کے سابق نیول چیف ایڈمرل ارون پرکاش نے انکشاف کیا کہ بھارت میں جاری مسلمانوں کی نسل کشی کے خلاف صدر اور وزیر اعظم کو لکھے گئے مذمتی خط پر بھارت کے چار سابق نیول چیفس اور ایک سابق ایئر چیف نے دستخط کیے۔
انہوں نے انکشاف کیا ہے کہ بھارتی فوج کے تمام سابق آرمی چیفس نے اس خط پر دستخظ کرنے سے انکار کردیا تھا۔ان کا کہنا تھا کہ چند روز پہلے بھارت کے اعلیٰ عسکری حکام نے بھارتی صدر اور وزیراعظم کو لکھے گئے خط میں مؤقف اختیار کیا تھا کہ ملک میں امن اور ہم آہنگی کی کوئی بھی خلاف ورزی دشمن بیرونی قوتوں کو حوصلہ دے گی۔
ایڈمرل ارون پرکاش نے کہا کہ خط میں 17 دسمبر کو ہریدوار میں تین روزہ مذہبی کانفرنس کے دوران بھارت کے مسلمانوں کو قتل کرنے کے لیے بار بار مطالبات پر شدید خوف اور افسوس کا اظہار کیا گیا تھا۔