بھارت کے معروف کرکٹرز نے بھی نامور بھارتی گلوکار کرشناکمار کناتھ المعروف کے کے کی موت کی خبر پر افسوس کا اظہار کیا ہے۔
بھارتی گلوکار کے کےکی گزشتہ روز کنسرٹ میں پرفارمنس کے بعد دل کا دورہ پڑنے کی وجہ سے 53 برس کی عمر میں موت ہوگئی۔
سابق بھارتی کپتان ویرات کوہلی نے مائیکرو بلاگنگ ویب سائٹ ٹوئٹر پر گلوکار کے کے کی موت پر افسوس کا اظہار کرتے ہوئے کہا کہ’اس طرح اچانک ہم نے اپنے دور کے ایک شاندار گلوکار کو کھو دیا ہے۔‘
ویرات کوہلی نے گلوکار کے اہل خانہ اور قریبی لوگوں سے تعزیت کا اظہار بھی کیا ہے۔
سابق بھارتی کرکٹر وی وی ایس لکشمن نے گلوکار کی ایک یادگار تصویر شیئر کرتے ہوئے لکھا کہ’شاندار گلوکار کے کے کی اچانک موت پر غمزدہ ہوں۔‘
اُنہوں نے گلوکار کے خاندان اور دوستوں سے تعزیت کا اظہار کرتے ہوئے لکھا کہ’ گلوکار اپنی موسیقی کے ذریعے ہمیشہ زندہ رہیں گے۔‘
جبکہ سابق بھارتی کرکٹر یووراج سنگھ نے گلوکار کی اچانک موت کی خبر سامنے آنے پر افسوس کا اظہار کرتے ہوئے لکھا کہ’زندگی بہت غیر یقینی اور نازک ہے
اُنہوں نے مزید لکھا کہ ’گلوکار کی اچانک موت ایک افسوسناک خبر ہے۔
کرکٹر نے اپنے ٹوئٹ میں گلوکار کے گھر والوں کے لیے دعا کرتے ہوئے لکھا کہ’ خدا اس مشکل وقت میں اُنہیں صبر اور ہمت عطا کرے۔‘
اس کے علاوہ سابق بھارتی کرکٹر وریندر سہواگ نے ٹوئٹر پر گلوکار کی ایک یادگار تصویر شیئر کرتے ہوئے ان کی موت پر اظہار افسوس کیا ہے۔