پاکستان سپر لیگ( پی ایس ایل) کے ساتویں ایڈیشن کے پہلے مرحلے میں اسلام آباد یونائیٹڈ نے کوئٹہ گلیڈی ایٹرز کو 43 رنز سے شکست دے دی۔
رنز کے ہدف کے تعاقب میں کوئٹہ گلیڈی ایٹرز کی ٹیم 186 رنز بناسکی، احسان علی 50 رنز بناکر نمایاں رہے۔
اس سے قبل کوئٹہ گلیڈی ایٹرز کی دعوت پر پہلے بیٹنگ کرتے ہوئے اسلام آباد یونائیٹڈ نے مقررہ 20 اوورز میں4 وکٹوں کے نقصان پر 229رنز بنائے،کولن منرو 71 رنز بناکر نمایاں رہے۔
اسلام آباد یونائیٹڈ کی اننگز
اسلام آباد یونائیٹڈ کی اننگز کا آغاز دھواں دھار رہا ، صرف 4 اوورز کے اندر ہی اوپنرر پال اسٹرلنگ اور ایلیکس ہیلز نے ٹیم کی نصف سنچری مکمل کی، تاہم 56 رنز کے مجموعی اسکور پر ہیلز 22 رنز بناکر آؤٹ ہوگئے۔
تاہم پال اسٹرلنگ جارحانہ کھیل پیش کرتے رہے اور پاوور پلے میں ٹیم کا اسکور ایک وکٹ پر81 رنز تک لے گئے۔اسلام آباد نے 100 رنز صرف 7.1 اوورز میں مکمل کیے ۔
تاہم اسلام آباد کو دوسرا نقصان پال اسٹرلنگ کی صورت میں اٹھانا پڑا ، وہ 28 گیندوں پر 58 رنز کی دھواں دار اننگز کھیل کر آؤٹ ہوئے۔اس کے علاوہ شاداب خان 9 رنز بناسکے۔
وکٹیں گرنے کے بعد اسلام آباد نے دوبارہ کوئٹہ گلیڈی ایٹرز پر لاٹھی چارج شروع کیا، کولن منرو اور اعظم خان کے درمیان 97 رنز کی شراکت داری قائم ہوئی۔
اعظم خان 35گیندوں پر 65 رنز بناکر آخری اوور میں آؤٹ ہوئے جبکہ منرو 39 گیندوں پر 72 رنز بناکر ناٹ آؤٹ رہے۔
دوسری جانب کوئٹہ کے شاہد آفریدی نے میچ میں پاکستان سپر لیگ کا مہنگا ترین بولنگ اسپیل کرادیا،انہوں نے چار اوورز میں ایک وکٹ حاصل کرکے 67 رنز دیے۔
آفریدی سے قبل یہ اعزاز اسلام آباد کے ظفر گوہر کے پاس تھا، انہوں نے گزشتہ سال زلمی کیخلاف چار اوورز میں 65 رنز دیے تھے۔
واضح رہے کہ کوئٹہ گلیڈی ایٹرز کے اسٹار پلیئر شاہد آفریدی کی ٹیم میں واپسی ہوئی ، وہ کورونا کے باعث ابتدائی میچ نہیں کھیل سکے تھے۔
کوئٹہ گلیڈی ایٹرز کی اننگز
دو سو تیس رنز کے ہدف کے تعاقب میں کوئٹہ کی ٹیم اسلام آباد یونائیٹڈکے بولرز کے سامنے جم کر نہ کھیل سکی اور پوری ٹیم 20 ویں اوور میں 186 رنز بناکر آؤٹ ہوگئی۔
اوپنر احسان علی 50 اور آل راؤنڈر محمد نواز47 رنز بناکر نمایاں رہے، اس کے علاوہ جیمز فولکنر نے 30 ،کپتان سرفراز نے 11 رنز بنائے۔
اسلام آباد کی جانب سے شاداب خان نےشاندار بولنگ کا مظاہرہ کرتے ہوئے 5 وکٹیں حاصل کیں جبکہ حسن علی اور محمد وسیم نے 2،2 شکار کیے۔